Pope Francis iti America (An Ilokano poem)

Author's Note: The poem below is originally written in Ilokano, my mother tongue. It is a humble tribute to Pope Francis on his visit to the United States. (He arrived yesterday afternoon, 22Sep2015, from his recent trip to Cuba.) I penned the poem this morning at 0815, while I was using our rest room (in our master's bedroom upstairs) and at the same time listening to TV, broadcasting Pope Francis to visit the White House this Wednesday morning. Btw, the White House arrival ceremony occurred about 9 a.m. Now, here's the poem...which I finished scribbling at 0845 a.m. today. Thanks, everyone, for reading/visiting my blog. do appreciate it:

Papa Francisco iti America

Manipud iti TV ditoy balaymi a nanumo
Naimatangak ti isasangpetyo
Kaunaan nga ibibisitayo
Iti America a namaris ken narungbo
Malem ti Martes, alas cuatro
Setiembre duapulo ket dua
Aldaw ken tiempo a naranga
Diay Andrews Air Force Base nagdappat ti Allitalia
Nangitayab kadakayo manipud Cuba
A nabisitayo iti mano nga aldaw
Ket dagiti Cubano inda nagririaw
A nakakita kadakayo a pangulo
Ti duduogan  a Simbaan Catolico
Iti entero a lubong a napintas ngem nagulo
Ta adun dagiti mapaspasamak a di justo.

Maysa a naisangsangayan a gandatyo
Panangbisitayo ditoy America
Isu daytoy naisangsangayan a padaya
Panangcanonizadoyo ti maysa a maibilangen a santo
Ni Blessed Junipero Serra a nag-evanghelio
Kadagiti nagkauna iti America a tattao
Dagiti American Indian a makunkuna
Tapno maadalan ken mapasingked pammatida
Ken Apo Dios a Namarsua iti Langit ken Daga
Isu a pagrukbaban, pagdaydayawanda.

Papa Francisco a naggapu't Latin America
Nakaiyanakan ken dimmakkelanyo diay Argentina
Kaunaan a Lider ti Catolico a saan a taga Roma, Italia
Kaunaan pay a padi a Papa manipud congregasion a Jesuita.

Jeorge Bergoglio ti pudno a naganyo
Ngem idi mapilikayo a pangulo ti entero a Simbaan a Catolico
Imbutaktakyo a Francis ti iyawagda kadakayo
Kas simbolo ti panagraemyo ken Santo Francisco
Iti Assissi a naasi kadagiti marigrigat, ken napakumbaba
Nabaknang idi ngem binay-anna tapno makipagrikrna kadakuada.

Papa Francisco, ikarkararagmi nga agballigikayo
Iti panagtakemyo a pangulo ti Simbaan Catolico
Iti panangiburayyo kapanunotanyo ken pammatiyo
Kadagiti amin a mamati ken Apo JesuKristo
Nga Anak ti Dios Apo a pagdaydayawantayo
Ken nangsubbot babak ken basbasoltayo.

Papa Francisco, Dios unay ti agngina iti ibibisitayo
Iti America ken dadduma pay a disso
Ket itultuloymi nga ilulualo
a sapay koma ta nasalun-atkayo
Tapno addakayo a mangsilaw pampanunotmi
Ken agtultuloy nga inspirasionmi.

-Chris A. Quilpa
23Sep2015/Suffolk, VA