Search This Blog

Thursday, June 30, 2011

Biag

Pakauna: Pampanunot maipapan ti Biag, aglalo iti naammuan a damag manipud iti maysa a kalugaran, ni Manang Vicky a kapagayam iti Facebook. Diak pagduaduaan a nabasana ti impostek a daniwko, "Away from Home," iti FB ken iti blogko idi kalman. Impadamagna ti ipupusay ni Iniong Felimon Benitez, maysa a kalugaran ken kabagian ngem agnaeden ken ti familiana diay California. Kastoy ti insurat ni Manang Vicky, "Hi Ando, uncle filemon benitez passed away 2 days ago in 'pinas; he was boarding the plane to fly back here when he had CHF so he was brought to the hosp there and didn't make it. let's pray for him and may he rest in peace." Sinungbatak met ket kastoy ti naisubalitko kenkuana, "Manang, thank you for the info (bad and sad news). Apo metten a manangaasi! who would expect him to depart so soon? may he rest in peace! nabayagen a saanko nakita ni iniong felimon. idi laenegen na-station datao diay balboa naval hospital diay san diego. alla, Apo...ania ngarud, manang, kasta la ti biag a kunada. adda dagiti pasamak a saan a pulos mapakpakadaan, and beyond our control, hmmmm. we'll pray for the family of the departed, too! manen, thank you, manang. take care." Daytoy sumaganad ti gapuanan ti panagpampanunotko maipapan daytoy a topiko..."Biag"

wen, nagastos ti agbiag
nagastos pay ti matay
nabaknangka man
wenno awananka.

anian a nakakalkaldaang a panunoten
no ti maysa a pinarsua pimmusayen
iti nabiit laeng a panagbakasionna
iti nakayanakanna a daga
a nabayagen a pinanawanna
tapno mabirokanna't gasatna
iti sabali a daga kas ti America
nga inaklonnan a pagtaenganna.

ket iti nabiit laeng a panagbakasionna
a napan immiliw, kimmita ken nagpakita
kadagiti ingungotenna a kakabagianna
nagtugmoken ragsak ken liday a di mamingga
ta iti panagsublina koman nga agpa-America
lumoganen iti eroplano a mangisubli kenkuana
di napakpakadaan ken ninamnama
ti panagsakit pusona ken ti ipupusayna.

biag, napintas ngem narasi
nupay nalaka wenno nangina
gameng a saluadan ken ilalaen
regalo manipud Ngato kadatayo.

wen, ania man a kanito
no alaenen ti Dios Apo
ti impabulodna a biagtayo
awan pulos mabalinantayo

ngarud, agyamantayo
aglualo-agkararagtayo
ken Apo iti biagtayo
ket agbiagtayo
iti kapkapnekantayo
ta daytoy unay a kanito
ti kangrunaan ti biagtayo
ita nga agdama...ita a kanito.

copyright 2011 by chris alibin quilpa

No comments:

Post a Comment